Органикалык калдыктарды иштетүүнүн тартиби жөнүндө

Тартипте жергиликтүү өз алдынча башкаруу органдарынын ыйгарым укуктарына өзгөчө көңүл бурулган. ЖӨБдүн аткаруучу-тескөөчү органдары өз аймагында органикалык калдыктарды өзүнчө чогултуу системасын уюштурууга, контейнердик аянтчаларды жана жеке турак үйлөрдүн жашоочуларын “Азык калдыктары үчүн” деген маркировкасы бар атайын контейнерлер менен камсыз кылууга, контейнердик аянтчаларды жайгаштыруу схемасын аныктоого, ошондой эле калк арасында маалыматтык-түшүндүрүү иштерин жүргүзүүгө тийиш.

Мындан тышкары, Тартип органикалык калдыктарды чогултууну, ташууну жана кайра иштетүүнү жүзөгө ашыруучу органикалык калдыктарды иштетүү боюнча операторлорду дайындоону карайт. Ири органикалык калдыктарды түзүүчүлөр үчүн калдыктарды өзүнчө чогултууну уюштуруу, атайын контейнерлерди колдонуу жана аларды ташып чыгаруу үчүн оператор менен келишим түзүү милдети киргизилет.

Ошондой эле документ менен органикалык калдыктарды башка коммуналдык калдыктар менен аралаштырууга жана өсүмдүк калдыктарын өрттөөгө тыюу салынат. Органикалык калдыктар негизинен компосттоо, анаэробдук ачытуу, вермикультивациялоо жана башка биологиялык ыкмалар менен компостту, биогазды, биогумусту жана башка пайдалуу өнүмдөрдү алуу менен кайра иштетилүүгө тийиш.

Жаңы талаптардын киргизилишине байланыштуу жергиликтүү өз алдынча башкаруу органдарына коммуналдык калдыктар менен иштөөнүн колдонуудагы системасына баалоо жүргүзүү, адистештирилген инфраструктурага муктаждыкты аныктоо, зарыл болгон уюштуруучулук жана финансылык иш-чараларды караштыруу, ошондой эле органикалык калдыктарды өзүнчө чогултуу эрежелери жөнүндө калкка маалымдоону уюштуруу сунушталат.

Тартипти ишке ашыруу калдыктарды иштетүүнүн заманбап системасын өнүктүрүүгө, экологиялык жүктү азайтууга жана Кыргыз Республикасынын муниципалитеттеринде айлана-чөйрөнүн сапатын жогорулатууга карай жасалган маанилүү кадам болот.

Булак: https://cbd.minjust.gov.kg/50-691/edition/54768/ru