Нагима ОЗОКЕЕВА, ЖӨБ Союзунун коомдук байланыш боюнча адиси

2025-жылдын 30-июнунан 5-июлуна чейин КР Жергиликтүү өз алдынча башкаруулар Союзунун эксперттери Жалал-Абад облусунун Токтогул районунун Токтогул шаарынын мэриясына жана элеттик муниципалитеттеринин ЖӨБ органдарына практикалык жардам көрсөтүштү.

Токтогул шаарынын мэриясында, ошондой эле Кетмен-Төбө, Толук, Сары-Камыш, Үч-Терек, Иманалиев жана А.Сүйөркулов атындагы айыл өкмөттөрүндө ЖӨБ органдарынын 60 кызматкеринин катышуусунда иш-чаралар өткөрүлдү.

“Практикалык жардам жергиликтүү өз алдынча башкаруу органдарынын күнүмдүк ишин өркүндөтүүгө, мыйзамдардын так аткарылышын камсыз кылууга жана калк менен иштөөнүн сапатын жогорулатууга багытталды. Мындай иш-чараларды республиканын башка аймактарында да өткөрүү пландалып жатат”, – деди КР ЖӨБ Союзунун директору Бектурган ОРОЗБАЕВ.

Практикалык жардам төмөнкү үч багыт боюнча көрсөтүлдү.

Жер маселелери: жайыт жерлерин пайдалануу; жер мунапысы; жерлерди трансформациялоо (бир түрдөн экинчи түргө, анын ичинде калктуу конуштардын категориясына которуу); жолдун боюндагы жер участокторун ижарага берүү; жалпы пайдалануудагы жерлерди максаттуу пайдалануу; токой фондунун жайыт жерлерин пайдалануу ж.б.

Муниципалдык кызмат көрсөтүүлөр: эмгек өргүүлөрү; келишим боюнча иштеген кызматкерлер үчүн түшүндүрмөлөр; иш кагаздарын жүргүзүү тартиби; түзүм жана штаттык ырааттама маселелери; разряддар жөнүндө маалымат.

Муниципалдык ишканалардын иши: ишкананын уставын түзүү; субсидияларды берүүнүн эрежелери; туура бухгалтердик эсепти жүргүзүү; муниципалдык мүлктүн бирдиктүү реестрин жүргүзүү; ишканалардын кызматкерлерине эмгек акы төлөө маселелери.