Түрмөктүн материалдарын EGED программасынын алкагында ӨСИнин жана БАЖБАнын буйрутмасы менен Ирена БАЙТАНАЕВА даярдады

Кыргыз Республикасынын Экономика жана коммерция министрлиги райондук социалдык-экономикалык өнүктүрүү программаларын (СЭӨП) иштеп чыгуунун жаңы методологиясын бекитти. Методика аймактарды адистештирүүнү караштырат жана жергиликтүү экономикалардын өсүшүнө көмөк болчу аспаптарды камтыйт. Программада жарандарды программаны иштеп чыгууга жана мониторинг жүргүзүүгө тартууга өзгөчө көңүл бурулган.

Программаларды даярдоо шаблону бардык райондор үчүн универсалдуу болуп калды, ал стандарттуу көрсөткүчтөрдүн топтому, ресурстарды баалоо (жергиликтүү бюджеттер, түз жана бюджеттик инвестициялар, аймактарды өнүктүрүү фонддору), чыгымдарды пландаштыруу, мониторинг жана чечимдерди кабыл алуу механизмдери сыяктуу элементтерди камтыйт.

Методика толугу менен ишке киргизилгенде, маалыматтар кылдат чогултулуп, системага салынганда, формалар толтурулуп, ролдор так бөлүштүрүлгөндө жергиликтүү мамлекеттик администрациялар өз райондорун өнүктүрүүнү натыйжалуу башкара алышат.

Жаңы методиканы сыноо үчүн өнөктөштөр, анын ичинде Дүйнөлүк банк, КР Экономика жана коммерция министрлиги жана Өнүктүрүү саясат институту пилоттук райондорду тандап алышты. Алар: Ат-Башы жана Ноокат райондору (ал эми 2024-жылы пилоттук райондордун катарына Айтматов, Жети-Өгүз, Базар-Коргон жана Баткен райондору кирди).

Өнүктүрүү саясат институту Улуу Британиянын Өкмөтү каржылаган “Экономикалык өнүгүү үчүн натыйжалуу башкаруу” программасынын (EGED) алкагында  пилоттук райондорго СЭӨПны даярдоого жана ишке ашырууга көмөк көрсөтүп жатат.

EGED программасы – Казакстанда, Кыргызстанда, Тажикстанда жана Өзбекстанда артыкчылыктуу реформалардын алкагында экономикалык саясатты ишке ашыруунун натыйжалуулугун, отчеттуулугун жана ачык-айкындуулугун жогорулатууга багытталган беш жылдык программа.