Нургүл ЖАМАНКУЛОВА, БАЖБАнын жана ӨСИнин коммуникациялар боюнча консультанты

2024-жылдын апрелинде Борбордук Азиянын Жергиликтүү башкаруу академиясынын (БАЖБА) директору Асель КУРМАНАЛИЕВА менен Кыргыз Республикасынын Президентине караштуу Мамлекеттик башкаруу академиясынын (КРПМБА) ректору Алмазбек АКМАТАЛИЕВ жолугушту.

Жолугушуунун жүрүшүндө тараптар Кыргыз Республикасынын аймагында мамлекеттик башкаруу жана жергиликтүү өз алдынча башкаруу жаатында кадрларды кайра даярдоо жана квалификациясын жогорулатуу чөйрөсүндө стратегиялык өнөктөштүктү өнүктүрүү максатында билим берүүчү эки уюмдун кызматташтыгын орнотуу маселесин талкуулашты.

БАЖБАнын өкүлдөрү КРПМБАнын өкүлдөрүн окутуунун ведомстволук багыты боюнча квалификацияны жогорулатуу курстары, ошондой эле тренерлердин курамы менен тааныштырышты.

Жолугушуунун жыйынтыгында төмөнкү багыттар боюнча кызматташууну ишке ашыруу ниети жөнүндө Меморандумга кол коюлду:

• мамлекеттик органдардын жана жергиликтүү өз алдынча башкаруу органдарынын кызматкерлеринин башкаруу көндүмдөрүн жана компетенцияларын өнүктүрүүдө тажрыйба алмашуу жана алдыңкы практика менен тааныштыруу;
• мамлекеттик органдардын жана жергиликтүү өз алдынча башкаруу органдарынын башкаруу кадрларынын квалификациясын жогорулатуу жана кайра даярдоо;
• мамлекеттик органдардын жана ЖӨБ органдарынын кадрларынын квалификациясын жогорулатуу жана кайра даярдоо курстарынын программаларын өнүктүрүү жана аларды даярдоо үчүн шарттарды түзүү;
• мамлекеттик органдардын жана ЖӨБ органдарынын кадрларды даярдоо программалары боюнча курстардын окуу материалдарын иштеп чыгуу;
• мамлекеттик жана жергиликтүү өз алдынча башкаруу органдарынын кадрларын окутуу чөйрөсүндөгү мыкты тажрыйбалар жана практикалар менен тааныштыруу;
• Кыргыз Республикасынын аймагында санариптик технологияларды, платформалык чечимдерди, окутуунун заманбап ыкмаларын жана технологияларын киргизүүнүн эсебинен мамлекеттик органдар жана ЖӨБ органдары үчүн кадрларды даярдоо чөйрөсүндөгү жаңы ыкмаларды үйрөтүү;
• мамлекеттик башкаруу жана жергиликтүү өз алдынча башкаруу чөйрөсүндө биргелешкен долбоорлорду, изилдөөлөрдү, эксперттик жана талдоо иштерин жүргүзүү;
• мамлекеттик башкаруу жана жергиликтүү өз алдынча башкаруу чөйрөсүндө эксперттердин бирдиктүү базасын түзүү жолу менен квалификациялуу адистерге жеткиликтүүлүктү камсыз кылуу.